Von Wilhelm Wilmsmeier

An Christi Himmelfoahrt, dat es Donnerdagg, den 29. Mai ümme 10 Uhr la’t de Museumshoff in Oeynhiusen wi’er teo de plattduütsken Kerken in. Dat es biuten in de Schützenstroade 35a un de Luüe goaht doa gean hen. Dat es niu oll teon 45. Moal, datt de Freundeskreis Museumshoff Oeynhiusen un de Evangelsken Emmaus-Kerkengemoine düssen Gottesdienst in’n Kerkenkreis Vlotho teohäope iutrichtet. Unner de Leitung van Martin Schomburg spielt de Bloasers van de Posaunenchöre iut de enzelnen Ortschaften, de teo de Emmaus-Gemoine hoiert. Datt äok de Technik klappet, doafäo sorget oin Team van’ CVJM.

Predigen up Platt doit Annette E. Gerling iut Gohfeld. Dat es Prädikantin un hoiert äok teo den Arbeitskreis „Plattdütsk in de Kerken“ vanne Evangelsken Kerken in Westfalen. Et hölt äok teohäope mit Pastor Matthias Mengel un oiner Lektorin de Liturgie van den Gottesdienst. 

Dat Thema van den Gottesdienst lütt: „Himmelfoahrt - Gott tuiht ümme“, up häochduütsk  „Himmelfahrt - Gott zieht um“.

Wat et mit düssen „Ümmetoihen van Gott“ up sick hät, dat stoiht in’n ersten Deile vanne Buibel in’n 1. Beoke vanne Könige, Kapitel 8. De iutsochten Veske votehlt doavan, wie de graute König Salomo ungefähr diusend Joahr veo Christus veo den Volke Israel stoiht un den ersten Tempel van Jerusalem met oinen festliken Gebet inweihen doit. Feo den König un suin Volk bedütt dat, datt Gott säoteosäggen „ümmetuiht“ van suin mobilet Heiligtum inne Wüste in oin fastet Hius in Jerusalem.

Feo Christinnen un Christen bedütt Himmelfoahrt, datt Jesus, de Gottessohn, säotäosäggen „ümmetuiht“ vanne Ähern in’n Himmel. Dat Gott „ümmetuiht“ van oinen Hiuse in’t nächste, dat es natürlich bläoß säo, wie wui Minsken us dat veostellt. In de Predigt van’n Himmelfoahrtsdoage schall froaget wern, wat äok de berühmte König Salomo süms Gott froaget häf: „Scholl Gott würklich uppe Ähern wuhnen?“ De König woit wall, datt de gröttste un schönste Tempel teo lüttch es feo den Schöpfer van dat ganze Universum.

Dorümme: Wie kann man sick dat veostellen, datt Gott irgendwo wuhnt un doa es? Un wat bedütt dat in oiner Tuit, in de hierteolanne gümmer mehr Kerkens teomaket werd? Noah den Gottesdienst kann man sick doar über wuider unnerhäolen oder äok ober Gott un de Welt küern, denn de Freundeskreis van den Museumshobe la’et wi’er teo Kaffeedrinken in’n Stoahen in.