Wiel ut de Arktis koolde Luft ankündigt is, werd de plattdüütsche Himmelfohrts-Gottesdeenst nich op’n Museumshof in Bad Oeynhiusen unner freien Heven fiert, man in de Auferstehungskerken am Kurpark verleggt.

In Gohfeld finnt de Himmelfohrts-Gottesdeenst an’n Dönnedag auk nich as ankündigt bi de Weihehiuser statt, man in de Matthäuskerken. Dat ganze Programm mit all de Mitwirkenden löppt as plant weer. Ok op Bratwust un Gedränke na den Gottesdeenst mut keen verzichten.

An Christi Himmelfoahrt, dat es Dönnedagg, den 14. Mai, ümme 10 Iuhe, loahrt de Museumshoff van Bad Oeynhiusen wier teo de plattdütsken Kerken in. Dat es biuten in de Schützenstroate 35a, un de Lühe goaht doa gern hen.

Dat es niu ull teon 46. Moal, datt de Freundeskreis Museumshoff van Bad Oeynhiusen un de Evangelsken Emmaus-Kerkengemeinde düssen Gottesdienst in’n Kerkenkreise Vlotho teohaupe iutricht’t.

Ünner de Leitunge van Martin Schomburg bloast de Blesers van de Posaunenchöre iut de enzelnen Ortschaften, de teo de Emmaus-Gemeinde gehöart.

Dat auk de Technik klappet, dorfür soorget en Team van’n CVJM.

Predigen up Platt döat Annette E. Gerling iut Gohfeld. Dat es Prädikantin un gehöart auk teo dehen Oarbertskreis „Plattdütsk in de Kerken“ (PidK) vanne Evangelsken Kerken in Westfoalen (EKvW). Et hult auk teohaupe mit Pesteoer Matthias Mengel un eine Lektorin de Liturgie van den Gottesdienst.

Dat Thema van den Gottesdienst lutt: „De Himmel es dor, wo Jesus es“, up hauchdütsk „Der Himmel ist da, wo Jesus ist“.

Inne Bibel werd vetellt, datt Jesus vür 2.000 Joahren van eine Wulken upnomen woed un in’n Himmel foihet es. Wo es de Himmel? Wat bedütt hei? Wo es Jesus noa siene Himmelfoahrt blierben? Un wat es mit dejenigen, de trüggeblieben mössen? Dat Fest Christi Himmelfoahrt es gedes Joahr up naaie Wiese aktuell.

Vür korten käak de ganzen Welt up „Artemis 2“, dat Spektoakel mit de Kapsel, de ümme den Moand ümmeteo flaug.

Woien de Astronauten nöager an’n Himmel dran os wi hier ünner uppe Ärhn? Dat sind spannende Froagen.

De Predigttext iut Joh 17, 20-26 häff en anneren Ansatz. Et gäaht nich dorümme, wo wiet de Himmel wege es. Oabe wat doa säggt werd, es für us uppe Ärhn genauso interessant wi für de Lühe, de dür’n Weltraum fleiget.

Noah dehen Gottesdienst kann man sick bi en Köppken Kaffe wieter dorrober ünnerhaulen, wenn man well, denn de Freundeskreis van dehen Museumshoff beiert wihe en Kaffeedrinken in’n Stoahne an.